Bas Luinge in het Drents 'Romantiek'

Assen

Dochter an de tillefoon met de mededieling, dat ze saomen met heur breur een bungalow huurt har veur een lang weekeinde in Bad Bentheim in Duutslaand. Dit as kado veur oeze 45 jaorige trouwdag.

Twee maond laoter zaten wij met kinder en kleinkinder in een prachtige bungalow. Op 't park ontbrak 't an niks. Der was een prachtig mooi zwembad en daor hew de eerste dag daolijk gebruuk van maokt. Non moe'k der bij zeggen da'k een slechte zwemmer bin, ondaanks diplomao A en B. Mien kleinkinder geleufden dat niet en wolden mij wel is zien zwemmen. Doe as ik 't badhok oet kwam, stunden de kleinkinder mij op te waachten. Evenpies laoter brak der een enorme laachbui lös. 'Opa', zeden ze in koor,'waor heb jij die zwemboks kocht?' 'Ach kinder, die har ik vrögger altied an under mien voetbalboks, 't ding is zeker dartig jaor old.' An blok besleuten ze um niet met mij 't waoter in te gaon, ze schaomden zuk dood, zeden ze.' Volgens mij, opa, bin jij gien romantische man, as jij net zulk underboksen an hebt as jouw zwemboks dan kan dat haost niet', zee de oldste kleindochter van 15 jaor. 'Nou', zee oma, die der ok bij stun, 'zukse underboksen hef e al jaoren an, opa wul niet aans, die is olderwets an 't worden.' Ik bin niet meer met hen zwemmen west. Wel is 't zo daw een geweldig mooi weekeinde had hebt, waor as wij met plezeer op weerumkieken kunt. Een week of wat laoter vun Geertje da'k een neie boks hebben mus. Wij bint naor een veur oes bekende kledingzaok west. De boks was rap kocht, maor Geertje wol nog evenpies verder kieken in de winkel. Ze bleef staon bij de underboksen. 'Ziej die daor liggen, die bint modern, dat bint boksershorts; die koop ik veur jou', zee ze. Nou um eerlijk te wezen huufde dat veur mij niet. Ik was zo wend an die blauwe veuroorlogse underboksen. Maor ik mus wel evenpies dèenken an mien kleindochter, die vun mij niet romantisch, har ze zegd in Bad Bentheim. Ik bin overstag gaon en zee tegen Geertje, 'nim der geliek maor 10 met en doe maor in verschillende kleuren, 'dèenkend an de romantiek. Iemaol in hoes he'k, zunder dat Geertje 't wus, der daolijk ien an daon. Doe as wij 's aovends hen berre wolden, was ik beneid hoe of Geertje reageren zul op mien neie underboks. Ze bekeek mij mij van top tot toon en zee: 'een blauwe stiet je beter as een gele.' Mien romantische gevuul weur deur Geertje zien opmarking fienaol de grond in baord. Bas Luinge. Bas Luinge (1944) is geboren In Drouwen, maor opgruid in Grol. Hie is trouwd, hef twee kinder en veer kleinkinder. Naost ‘t schrieven is sport zien grote hobby. Foto Lammert Aling.

Auteur

Albert-Jan Garama