Jan Hartlief is de neie taolschulte van Aa en Hunze

GIETEN

Het Huus van de Taol hef in elke Drentse gemiente vrijwilligers, die van alles oet het stro zet. Dizze gemientelijke ambassadeurs van de taol wordt aanvoerd deur een zogenuumde taolschulte.

In Aa en Hunze was dat de ofgelopen jaoren Anton Postema. Anton hef met zien helpers (keurnoten) hiel wat daon. Under andern wordt er in de meertmaond in de streektaol veurlezen in alle groepen van alle basisschoelen van Aa en Hunze. Op dit gebied mag trouwens ok de rol van keurnoot Janny Bruins niet onvermeld blieven.

Wieder hebt taolschulte en keurnoten nog veul meer daon, zoas tenielspeulen in het eerste ienakterfestival van het Huus van de Taol, activiteiten in de gemienteraodsvergaderingen, culturele middagen en aovends organiseren en kwissen doen met inwoners van de gemiente. Taolschulte en keurnoten vörmt gewoon een hiel mooie, actieve groep.

Per ien april - en dat is beslist gien grap - is Anton Postema as taolschulte opvolgd deur Jan Hartlief oet Gieten. Net as Anton Postema hef Jan Hartlief jaorenlang in het underwies warkt, u.a. as directeur. De leste jaoren is Jan ok meer en meer actief worden op het gebied van de streektaol. Zo hef e de docentencursus Drents volgd en gef e namens het Huus van de Taol Drenthecursussen. Ok döt Jan Hartlief wark veur de underwieswebsite www.wiesneus.nl.

Van het Huus van de Taol har Anton Postema gien stappie terug huven te doen, maor de streektaolorganisatie is der bliede met dat der in de persoon van Jan Hartlief een geweldig goeie opvolger komt.

Eigen foto


Auteur

Redacteur