KERSTVERHAOL

Begun december belde Karsten, oeze kleinzeun van zes jaor op, of e in de kerstvekaansie wel een dag of wat bij opa en oma in Grol logeren much. Naotuurlijk much dat, je kleinzeun oet Doetinchem ziej niet alle daogen. Hie weur braacht deur zien pap en man en zussie Rosan, van twee jaor. Oeze zeun wol wel graog dat wij hum weerum zulden brengen en - as’t kun - veur de tweede kerstdag. Want dan weur in de katholieke kerk - Karsten zien mam is katholiek -‘t kerstverhaol verteld deur de kinder van groep zeuven en aacht van Karsten zien schoel. En daor wol e geern bij wezen. Nou, dit was veur oes gien enkel probleem. Kleinzeun hef oes goed bezig holden, maor dat kun oes niks schelen, daor bliej jong bij. ‘s Aovends zaten Geertje en ik - mu, maor voldaon - bij de kachel. Karsten was al lang en bried in dreumlaand. ‘Wij kunt der mörgen wel is met naor de iesbaon gaon‘, zee Geertje op een gegeven moment. Ik vun ‘t een hiel goed idee, ‘maor dan nim wij Esmée en Lars ok met.’ Jao, wij hebt der twee in Doetinchem, maor ok nog twee in Assen. Esmée is negen en Lars is, net as Karsten, zes jaor. Oeze dochter hef de kinder braacht en wol zölf ok met naor de iesbaon, ze much ok geern scheuvellopen. Met oes zessen heb wij de hiele middag deurbraacht op de iesbaon. Doe as wij tegen een uur of veer hen hoes wolden, kunden wij ze niet met kriegen. Wij hebt ze nog een haalf uurtie geworden laoten en doe vunden wij ’t genog. Oeze dochter is met de beide kinder weer hen hoes gaon en Geertje is intied met ‘t eten an de gang gaon. Karsten was kepot en is daolijk nao ‘t eten hen berre gaon. Ok Geertje en ik wolden ‘t wel geleuven en lagen der op tied in. De volgende dag, eerste kerstdag, hew Karsten weer hen hoes braacht. Hie mus tweede kerstdag naor de kerk veur ‘t kerstverhaol. Zien mam en Geertje gungen met. Zeun en ik bleven in hoes, wij hebt op Rosan past. De tied hew deurbraacht met wat tillevisie kieken en plannen maoken veur ’t ankommende fietsseizoen. Wij wolden de Amstel Gold Race in Limburg en de Jean Nelissen Classic in Luxemburg fietsen. En as training veur dizze zwaore tochten, hadden wij ‘t oog vallen laoten op de Teutoburgerwaldtoertocht en de Tecklenburger rundfart. Ok gien misselijke jongens! Tegen de klok van aacht uur wadden Karsten, zien man en oma der weer. ‘Het was hiel mooi west zeden ze, de kerk har bomvol zeten.’ Veurdat ‘t kerstverhaol verteld weur, har Meneer Pastoor nog het ien en aander verteld over de betiekenis van kerstmis. En har toen ‘t woord geven an de kinder oet groep zeuven en aacht. Meneer Pastoor gung op de eerste rij zitten, toevallig naost Karsten. En dat meuk’n geweldig indruk op hum. Met grote ogen zat e de Pastoor an te kieken. De kinder hadden geweldig heur best daon,‘t kerstverhaol weur hiel mooi verteld. Jao, ze hadden ‘t een prachtige kerstaovend vunden, ze hadden der van geneuten. Ok Karsten vun ‘t hiel mooi. ‘Dus je hebt ok geneuten Karsten?’ ,vreug zien pap. Jao, dat har e. ‘A’k aander jaor weer hen gao, hoop ik, dat Jezus weer naost mij zitten giet‘, zee e.

Nieuws